|
Sa Bukir
Daryl Faderogaya Famisaran
E-mail:
dffamisaran@yahoo.com
Tong maisot pa ako ay hagto kami gi istar sa
bukir it Timbaon. Kag amo bayay ay natokor nagtutulay sa bagontor sa
tunga it kakwadanan. Maruyomroyum pa ay narorongganey nako si tatay ag
si nanay nak nagkakanta imaw ra't pukaw sa among maintik pang mga apas
nak magpasalamat sa Ginoo sa pangamuyo nak imaw't ma bulig ra buno sa
osa'g osa sa osang bilog ray nak adlaw nak pagpangabudlay.
Waya pa gani na subat kag adlaw ay nag
bayahakey kag mga tankali sa tumbo't kado kag usa ay sa acasia
nagsasabtanan nak nopay nag sisiling nak asing waya pa kamo natikotiko
ay masubatey kag adlaw.
Kaming roha ni manong ay imaw ra't pas-an it
rohang pasuk nak mapa-ilig sa bal-ong os-os sa hanrig nak hariin imaw't
amo sag-uban. Pag abot roto ay so pagkadupit pang dorong rahon ag rag-ot
kada ay amo anay ina limbasan it bagoy maghuyat nak mag ilig ray
hanggang kami ay maka puno.
Pagkabubug-at rang pas-anon miski malip-ot
yang nak kwadan kag amo sag-oban. Hupit kag amo likor sa mga inilwak nak
tubi. Sa kada tikang pa tukar sa bagontor pa-uli sa bayay ay ka pilay ra
ag kapoypoy kag baraso it kapipigong sa mahanlas nak hupit nak pasuk
agor indig yubir. Kada napahuway anay kami ina pasanrig sa puno-an it
tawan ag mag pangmadabas.
Bodoboy kag madabas ag narogay kamit pang
hiknit kada na abutan kamit ayaba ni nanay nak nag huhuyat it tubi nak a
gamiton sa pag kaydo para sa amo pamahaw. Kada imaw ra namo't rali rali
ni manong mag pas-an it tong amo sag-obanang pasuk ag sahoy ra't ingkib
it hubay nak madabas.
Pagkahapon, bag-o mag ingkor kag adlaw sa
sugbuhan ay naka onogey si nanay it paninghapon. Inggwa't yinagang hilaw
nak batag ag isawsaw sa pakasam nak ing yuritan it iba ag sili. Indi ra
mawar-an it inaslom si nanay nak tambo nak ing pahanlasan it kinudot nak
usbor't kado ag tagabang. Kada masahoy ra kag amo higop ag mag
popanaghoy ag mag pisngo-pisngo ag masamot kag rilam dahil maayat kag
sili. Pagkatapos it paninghapon sa nag tugkarey nak gab-i ay narap-ong
kami ni tatay para inggwa it suga si nanay ag si nene nak magpanghugas
it pinggan. Ag mag ingkor kaming tanan sa marakong karosa sa irayum it
bag-ong subat nak buyan ag hagto kami magkanta, magpasalamat nag
oorasyon sa Ginoo ag mag pangamuyo ray nak kami'y ida bantayan sa among
pagkapisok hanggang mag aga.
_________
Editor's Note:
Daryl, 45, is a native of Dapawan, Odiongan, Romblon. He writes from
Mindanao. He accidentally passed by Sanrokan News Magazine while
tinkering with his computer. Read his letter to the editor |
