Sarawayon
Arez G. Pasion
Homepage: www.pyxis360.blogspot.com
Si Tatay kag Nanay pirme naga ugtas
Sa sarawayon nga unga kung magsabat haras-haras
Pag hapit it barkada, wat pamuhon nga nagtawas
Indi ron masaydan kung diin naglinayas.
Ang unga nga pasaraway puerte ka bagulan
Bisan ano it laygay ana lang ang matuman
Anang waros ang masunod,indi gid matudluan
Nagalain ang boot kung indi mapasugtan.
Ginahambalan it mayad, ang uyahon nagakusmod
Kung imo sugo-on hay naga minuramod
Sa ana mga magulang uwa it pagtahod
Ang mga bilin it mal-am uwa ginasunod.
Sakit sa ulo ang unga nga sarawayon
Naga-tao it problema, karaugot dumdumon
Ang ana mga mal-am dali mag masakiton
Pirme naga dumot kag naga kunsumisyon.
Kung ang mga unga indi magpasaraway
Uwa it problema ang bug-os nga panimalay
Naila, nagakadlaw si Tatay kag Nanay
Ang tanan sa pamilya hay puno it kalipay.
Ngani magpasakop kag maging masinundanon
Sa mga bulohaton pirming mabinuligon
Indi magmuramod sa tanan nga himu-on
Uwa't mayad nga matabo kung kita hay sarawayon.
|
