|
Itsura, Salamin ng Pagkatawo (Ini)
Chenaniah R. Malay
"Kamo nga duha, Vangine kag Aldine ang mga
napili nga empleyado para sumpungon ang mga bisita para buwas nga aga.
Ang bisita naton buwas hay isa gid ka dako nga tawo. Siya hay isa ka
tag-iya ng madamo nga kumpanya kag hotel. Ini nga mabahoy nga hotel nga
gina trabahuan nindo hay iya man ngani buwas hay indi ko guid gusto ng
mga mali buwas, intsende?!!" singgit ng manager ng hotel. "Buwas dapat
ng alas siyete hay yari na kamo. Bukon alas sais singkwenta'y nuebe o
kundi man alas siyete uno. Gusto hay sakto alas siyete." Dugang pa niya.
Excited na guid kaayo ang mag-amiga nga sina
Vangine kag Aldine. Si Aldine hay isa ka babaye nga bisan bukon
kaguwapahan hay mahugod naman kag mabuot nga ibang-iba naman sa iya
amiga si Vangine. Si Vangine hay gwapa nga babaye pero suplada ka malain
ang batasan.
Pagkasunod nga adlaw,eksakto alas
siyete ng aga, nakapwesto na ang mag-amiga sa pasuyuron ng hotel. Habang
gahuyat ang duha para sa mga bisita si Vangine hay masako guid kaayo
kapapagwapa. Halos idikit na niya iya ning itsura sa salamin. Si Aldine
naman. Hay waya ning daya nga kolorete hay ginaprinaktis na lang guid ng
iya ning ngilit para bisan pauno hay maging presentable man siya.
Maangan-angan, may tawo nga nagpalapit kay Vangine. Ang tawo hay
nakasuksok ning baro nga kung tan-awon mo hay daw pang mangunguma kag
ini da siya hay may daya pa nga manok.
"Palihog lang maam, may bakante pa ba
nga kwarto diri sa hotel?" pangutana ng tawo. Waya siya inistorya ni
Vangine. Tinan-aw lang siya ni Vangine tuna siki hanggang uyo. Kag
halata mo guid sa itsura ni Vangine nga indi niya gusto ini nga tawo kag
naugot siya diri kay busa naisturbo lang siya sa iya ginahuman. Nang
magpangutana liwat ang tawo, lumain na guid ang panhimutibo ni Vangine
kag sininggitan niya ang tawo nga waya na ning pwede pa nga kuwarto para
sa tawo.
"Humalin ka tao diri. Bukon ini nga
lugar ang pwede sa imo. Sigurado da nga sa itsura mo nga ina hay waya ka
kuwarta. Madaya daya ka pa ning manok!" kakusog nga hambay ni Vangine.
Daw nahuya guid ang tawo kag nagpangupos. Nakita ni Aldine kung ano ang
natabo gani pinalapitan niya adtong duha.
"Vangine ano ang problema diri nga
ikaw ay nag singgit?" pangutana ni Aldine. "Ini busa nga yaki nga ini
hay gapilit guid na magbuoy ning kwarto sa hotel kay halata da nga waya
siya kuwarta, sabat ni Vangine.
"Pero dapat Vangine hay waya mo anay
ging husgahan siya sa iya ning itsura. Bukon da tanan na tsadna ang
pamaruan hay waya kwarta kag nakita mo ba guida nga waya siya kuwarta?
Ang mga ga suyod diri sa hotel hay dapat ginapakitaan ta ning maayo. May
kuwarta man sinda o waya, bukon ta na adto problema," hambay ni Aldine.
Dinaya ni Aldine sa iya puwesto, nag
anunsiyo ang manager nga ang bisita nga ginahuyat hay nag-abot na.
Natingaya ang mga empleyado kay waya ngani sinda may nakita nga nagsuyod
nga bisita. Nang pagkadason nga adlaw, pinatawag ang mag-amiga sa
opisina. Natingaya sinda kay ang tag-iya ng hotel hay kaitsura ng adtong
tawo nga mangunguma. Sa kahuya ni Aldine hay daw matangis siya. "Bilib
ako sa imo Aldine gani dahil sa imo ging pakita hay ikaw hay maga isa ka
mataas nga tawo ng hotel. Pero nasubo guid ako sa imo guing pakita
Vangine. Siguro tama lang guid nga pahuwayon
ta anay ikaw sa imo trabaho. Ipatawg na lang nakun ikaw," masubo nga
hambay ng tag-iya.
Nagluwas si Vangine sa hotel nga naga-uwang.
Kung ya lang kunta siya nagpanglait ning tawo dahil sa iya panluwas nga
itsura. |
