Mga Paino-ino It Osang Romblomanon

Rapit hapon, kong pangaliherey ka adlaw, mayongotey sa sugbuhan. ingua't tawong nagiingkor - nopay estatuwang nagpapangami-or ag pay pagkarayumrayom ka ida pagmuon-muon it ni-o mang bagay nak nagsisikwil sa gibahan it paino-ino.

Rapit hapon, siguing ro-aw ka mga kalag it mga haponanong bodoboy it mga panambitong masadya, mahapri, ag kasamisamihan ay nagraraya it kabuyong nak nopay nagmamaismais nak ga-os sa yupa-yupa.

Lalo-ey kong pasko. It kag kaling tawo'y maisot pa. It kag sida'y nagaaray sa elemtarya. Kada pasko, inapangutana ka ida tatay ang nanay: hari-in ka ako tatay ag nanay sa bunyag? Ay ilam, ka sabat ninra. It kag panahon it Hapon, maramong nawaya nak tawo sa Bantoon. Kada pasko, ka ako ruhang maguyang nak manang ay bitbit ka pinawikan ang kong kaiba ay osang sagang suman.

Maramong bayay nak masasakaan sa banwa. Roto kana Tatang Asio ikaw inataw-an it osang centimo ag kong ikaw ay kilaya, ka imo pakumkom ay osang bagong. Roto ka na Mrs. Pimlak ay tinapay ag nogat; kana Nilda'y marhuda ag binukbok; kana Nanang Kula ay tiniping ag hinog nak tudlo; kana Tatang Anroy, ikaw inapainum it kape nak sinabag nak bugas; roton sa Guyangan kang Nanay Ine ay salabat halin sa bag-ong hugot nak yud-a.

Maramong naayaman bag-o magpasko. Osang beses, pinakita sa amo ni Mrs. Falcone ka osang retratong de kolor ni Santa Claus. Imaw yaki si Santa Claus! Maputi it bayongos ang habokon ka bagusbos. Ag abang puya ka ida baro! Ako'y napaukaw: "Kong rumayan si Santa Claus sa Togbongan, alahayon it katong toro ni Tatang Teti." Kinunit ako ni Mrs. Falcone. Kada gabi, ka siling ni Mrs. Falcone, si Santa'y naruaw sa bawat bayay ag kong ikaw ay maado, maaring matwa-an ka it pamasko nak mansanas. Kada orasyon, maramong "Ama'y Namon" kag ako nangungutabngutab.

Maramo pating kantang ayam ni Mrs. Falcone. Halimbawa, "Rodolf da red nos rendir" ag "Wayt Krismas." Nopay ako'y naguluhan. Siguroy si Rodolfo ay pay osang nabadoktong na kambing nak pumuya ka nguso. Ag asi arang maputi ka pasko. Kada siguro maputi ay dahil nak maputi kag bayongos ni Santa.

Madekorate kono kami it krismas tree, ka siling ni Mrs. Falcone. Nagpuyor si Andoy it kuadan nak ingua pa't mga rahon. Boko kono kina krismas tree, kami'y binisar-an ni Mrs. Falcone. Ka korte it krismas tree ay payn - matagar sa tumbo. Ni-o ki-ing payn? Drenowing ni Mrs. Falcone sa blakbord ka kahoy nak "pine." Tuna it kato, kada pasko, napoyor kami it kahoy ag ka puno ay amo inagapos it mga sanga halin sa iba pang mga kahoy agor ka korte ay "pine." Inakunit kami ni Mrs. Falcone kong ka amo inakanta ay "o krismas payn" imbis nak "o krismas tree."

Maramong ako mga kaklasing nag drowing it mansanas ag rendir ag uda ni Santa Claus. Pagkaadoado! Pagkabalibali! Nasadyahan si Mrs. Falcone.

Rapit hapon, naruromruman it osang tawong nagpapangami-or katong ida drenowing nak hinog nak madabas.

++++++