PAHATAG ANAY! (Ini)
Marichel Mutia Dominguez

"Tanan ba nga mga tawo diri sa indo hay indo kahalihan?"

Natuingaya aco sa ini nga pangutana ng acon isa nga kaklase nga guindaya co sa bayay namon sa San Agustin nang nagligad nga bakasyon. Guin pangutana co kung basi nia adto nahambay. Siling nia, cay busa hay guina pahatagan co ang halos tanan nga maguyang nga amon masumpungan.

Didto co naisipan nga hunahunaon kung basi ngani gapahatag sa kamot ng mga maguyang.

Sa amon sa San Agustin waya ka huya kag hambugon ka pag icao indi magpangbugno tawo, bisan bukon mo kilaya. Ang pagpahatag sa kamot hay tanda nga icao hay antigo magdumdom sa imo guin halinan. Ini hay isa nga kaimportante nga bagay nga nagapapuyo sa mga pumuluy-on. Imao na lang ang acon kalipay pag naga-iling ang mga maguyang sa amon nga "Abaw ini nga unga puat lang guid pahatag", pero ano ang kasubo ela kung acon mabatian sa inda nga sa nian nga panahon hay kalaka na lang guid ang mga guinikanan nga nagatudlo sa inda mga unga nga magpahatag.

Basi, ano gali ining igwa sa pahatag nga aton dapat pa importansyahan? Bucon ba nga sa pagpahatag hay naipapabatyag naton sa aton guinikanan nga sinda hay aton palangga kag aton guina tahod? Bucon ba nga ini hay tanda nga aton cinda guinaquilaya? Kag ini nga pamatasan hay isa sa nagapadayon ng aton relasyon sa inda?

Ang pagpahatag hay isa kaugali nga katam-is kaayo cay ini hay tanda ng pagpinalanggaan ng isa ka pamilya cag ng isa ka lugar.

Huna-hunaa lang nindo…cay-ayo nga sa isa ka banwa hay may pagkakakilay-an kita nga pamatasan nga naga paupod sa aton. Ang pagpahatag.

Ngani mga Nene, Nono cag Toto…

Pahatag anay!

*Marichel Dominguez, 20, is a Harrow Staff, official publication of RSC Odiongan. She wrote this essay on pahatag (pagmano) during the workshop.