PISAR (asi)
*Miv Fabella

MAHIWAS:
Nanay Rohing - (isag pa mahiwas) maguslit nak kabadi
Rodolfo - relihiyoso, maguyang nak kayaki
Ronelia - suyok, masunor sa maguyang, paksi  
Rosa - mabuot, pangtatlong pusgo, kabadi  
Ronaldo - waya it labot, poto sa magmanghor

BUTANG: Ka-uutoy yang it hingab ni Nanay Rohing. Matapos magkisay-kisay sa pagyagor it hingabon ay binaoy rang gador sida it Ginoo. Naluoy yi'y sa ida dahil sa sida'y kaguyangiy ag mayuday.Nakalibor kag mga pusgo nak mga yuha'y nagtutunaey it tinikragan.Natapos.Nag-iistoryahan hagto mismo sa tunga it namusdok nak maguyang kung ano ngasing kag ahimuon nak waya ey kag enra nanay.Waya anay paembalsahan baka kuno kag ispiritu'y nag yuyupar-yupar pa sa palibor ag sumuyor uli sa yawas.

Rodolfo: (Naglimpyo anay it uda ag nagpaher it yuha raya sip-on.) Ngasing nak si Nanay ay namusdok key gusto nakong magtuna ey kita it tiko-tiko para sa ida burol ag yubong. Maghoman kita et desisyon kung pilang adlaw ag sauno kag ida rapit. O ano?

Ronelia: (Aba'y masadya ag nakangisi pa.) Ay asing mauno pa kita? Raan natong iyubong kina para makaiwas sa gastoson. Bug-at yang pati kina sa ato.

Rosa: (Nasubo sa siling ni Ronelia.) Ay asi ra Manang, indi anay ra apaabuton anay nato kag ida mga manghor.

Ronaldo: (Nahupot sa ida kakamping si Ronelia.) Ay sus! Tama si Manang taun-on pa nato kina, mapipilay yang kita.

Rodolfo: (Sinuway si Ronaldo) Asing tuyar kamo! Minatay yiy ngani si nanay ya gihapon kamo ig babag-o. Taw-an nato sida it maadong yubong baga.

Ronelia: Para ano pa? Musdok key kina ag waya ey it puyos.

Rosa: Aba'y matapos nimong mautangan et rakong kwarta sa ida pension ay atuyaron niy nimo sida?

Ronelia: Waya ka it labot hagto. Ako kato utang ag buko imo.

Rodolfo: Sus! Mga nene, buko kina kag dapat natong istoryahan ngasing kundi kag ida yubong.

Ronaldo: Ay hala paspasi'y ngani ako'y inggwa pa it apagtuang kasadyahan.

Rodolfo: Mga osang Dominggo nato sidang iburol ag sa Sabado nato sida irapit.

Roneldo: Abang rugay rang pisaran kina, hala sige tuloy!

Rodolfo: Tutal ngasing yang kita makakahimo it tuyar it kali masunor kita sa inghimo nina Angkol Berto kato. Mabakay kita et mahay nak kabaong dahil inggwa ra et pension ag abatunon sa seniors si nanay, no?

Ronelia: Abo! Asing kailangan nak gador nak mahay, katong barato yang para karako kag ato partihan sa ida mababaoy nak insurance.

Ronaldo: Klaro kina!

Rosa: Indi ra, kaluluoy si nanay.

Rodolfo: Basta mahay! Imaw wey kato. Masunor ay masuksok kita it itom nak yamit sa ida yubong.

Ronaldo: Abang arte ra! Ayam nak abang itom ngi'y nako masuksok pa it tuyar nak kulay.

Ronelia: Sunor yang baga!

Rodolfo: Indi kuno kita eg kaligos kayain kato ag magpanilhig.

Ronelia: Ay sus! Kina't indi puyde. Mapay-ot ako't kali ag baka yumamusang kag likot dili sa ato.

Ronaldo: Ay ako ra! Ay kung pumale kag ako mga barkada ag mahugman ako nak uya nakaligos, kahuhuda.

Rosa: Puro raw kamo kainarte. Sunor yang baga nak waya ra it mawawagit sa ato. Sunron yangiy nato para uya't masiling kag mga kahalihan ag kayungot.

Rodolfo: Ag kita'y maparasay ra kuno et sidam nak gab-i.

Ronelia: Hala yang! Mga kung ano ray nak ngutib-ngutib kina kag ibisaya.
Rosa: Pasugti yang kinay sa kaaduhan ni Nanay.

Ronaldo: Ay asing indi natong pasugayan kag ida lamay. Para ra magkakwarta kita abay-an sinra nato it tong bawat lamesa.

Ronelia: Imaw! Aduhon yang nato kag partida it gana ha?

Rosa: Hay basta kwarta ka narako kag imo talinga.

Rodolfo: O sige kato yang. Waya ra et iba pang dapat natong pag-usapan. Kung inggwa pa ay sa pilang adlaw ray nato istoryahan.

Ronelia: Anay! Ay katong kadutaan, ay syempre kag tungaan it kato?

Rosa: Indi anay ra sa pagyubong ngiy ni Nanay.

Ronaldo: Ngasing ngiy, imaw ra gihapon kag aabutan kato. Ralion nato para yang makaabot kato sa ako pagpagto sa ibang bansa. Makakabulig ra kato miskan maisot yang.

Rodolfo: Asing tuyar kamo? Waya kamo it ing-iisip kundi inro pangsariling kaaduhan. Ya anay ninrog taw-i it atensyon kaling inro maguyang. Ya pa ngani kali nababay-an it rugo anu-anong mga butang ngi'y kag inro ahumanon.

Rosa: Tama kina Manong, kaling ruhang kali waya et mga pakialam sa butang ni Nanay.

Rodolfo: O sige tunaey nato kag pagraya sa ida sa punerarya. (Tuminrog ag hanra ey nak lumiwas, pero humiwas… humiwas kag damot… kag da…mot…ni…Nanay)(Biglang humingab, nagmukyat, pumanghakay ag bumisaya.)

Nanay Rohing: Ahaayyy! Abi nako ako'y mamumusdok kiy. Ing taw-an pa ako it Gino-o it tyansa. Siling nida ay inggwa pa kuno ako't apandoon pa dili sa ato pamilya. Ano ara kato? Ano mga anak, asing nauno kamo?

Mga Anak: (Rumako kag mga mata, pumanguyog kag mga suka, tumungon it yabunok kag kasing-kasing, pumangtinrog ka tanang buhok ag ragusong rumayagan paliwas it bayay).

*MIV is Jimvim Fabella, the Associate Editor of The Harrow. He wrote this play during the workshop.