Plataporma Ninda (Ini)
*Erwil Roda

Tawohan:
Anti Glor - kandidato
Pinindo Poe - kandidato
Siraul Lu - Kandidato
Eping lapso - kandidato
Reporter - nagapangutana sa upat nga kandidato

Sitwasyon: Ginapangutana ng mga taga-Romblon Txt ang mga gakandidato pagkapresidente kung ano ang inda mga plataporma.

Sa pag-abre ning tilon… naga-inatubangan ang upat nga kandidato pagkapresidente kag sinda hay ginapangutana ng isa sa staff ng Romblon Txt.

Romblon Txt: Maayo nga adlaw sa indo nga upat. Madamo nga salamat hay nagkare kamo ari niyan sa amon imbitasyon para masayuran namon ang mga plataporma nido. Tunaan naton sa imo Anti Glor.

Anti Glor: Sayod mo Manong, nag re elek ako kay gusto ko pa na buligan ang mga Pilipino, kag sayod ko da pati na indi gid ako pabay-an ng bilog nga tawo sa Pilipinas. Kuntento gid busa sinda sa akon serbisyo.

Pinindo Poe: Pati da ako sa imo (atubang kay anti Glor). Ako ngani indi ngani kunta ako gusto magdayagan sa pagkapresidente pero i ahat ako ninda na malaban kay bukod kuno sa gwapo na ako artista pa.

Eping lapso: Hinugay ngani kamo. Ako ngani nagahipos hipos lang kay sayod ko na ang akon padaog.

Siraul Lu: Basi mo naman nahambay ina? (Ginasiro si Eping Lapso) Basi ang bati-bati ko kaydaku gid kono ang akon lamang. Gintrato ko na ngani tanan na tuba kay mablow-out ako.

Pinindo Poe: Pero ako gida indi ko gid gusto nga maperde. Kay isa pa yara ang mga Muslim sa Mindanao na mabulig sa akon. Ang hambay pa ngani ninda pag ako ang nagdaog waya na konoy abu sayaff kag MILF.

Anti Glor: Indi na ina magpati sa imo ang mga tawo. Basi ako presidente ari niyan, kay dahil sa Pipol Pawer, ginusto ninda na pababa-un si Erak Espada kay korap ngani kuno. Ngani ikaw Pinindo sira ang tan-aw sa imo ng mga tawo kay bes pren mo kono si Erak Espada.

Siraul Lu: Basta hakup ko gid ang mga kabataan. Kag halos tanan kuno nga tawo hay nagreklamo kay ang bugas kono nga ginarasyon mo Anti Glor hay maganghaw kag damo kuno ang bato kag pasi-on pa.

Eping lapso: Imaw ngani. Tan-awa ang mga ampin ko nga sundalo nagakalisod kay pasi-on kono ang bugas. Kag kalipay sinda kung kaamat kay ginaataw-an ko sinda pambakay sardinas aber kupit lang adto kaysa magtiis ngani sinda sa karne ng singgayong.

Pinindo Poe: Tama na da ina ang indo pagnilibakan. Basta pag pinadaog ako bilang isa ka preseidente hay libre tanan magsiro ning sine.

Anti Glor: Hay pauno na lang adto (ginsabat si Pinindo). Ya na gali humanaon ang mga tawo magasiniro na lang sine aber nagakutoy ang tiyan. Ngani ang plataporma ko hay ang pagpadayon sa pagrasyon ning bugas. Kag kung dumaog pa ako hay may kaibahan na na isa ka lata na sardinas kag isa kaputos na tuyo.

Siraul Lu: Kung ako naman ang pangutan-on pirme ko gid tangwayan ang mga kabataan. Kag tangwayan ko day shoktong ang mga maguslit. Agud pag-abot ng gab-i hay matuyog na lang. Imaw ini ang akon plataporma.

Eping lapso: Sa akon naman simple lang. Taw-an ko ning baril ang mag tawo agud pag nilusob kita diri ng mga Hapon may panlaban kita. O di ba? Mas pinakamaayo ang akon plataporma. Lab ob contre ini.

Romblon Txt: Hay madamo gid nga salamat sa indo nga upat. Kay ayo gid ang indo plataporma. Ngani ang matatabo siguro, tabla lang ang indo mga boto. Ngani mas kay ayo adto upat ang Presidente ng Pilipinas.

Sa pagsarado ng tilon, hay nagapanagitlon ang upat kag kinakuybaan man kung sin-o ang madaog sa inda.

*Erwil is 19 years old and takes up BSBA at IBA-RSC. He wrote this play during the workshop.