Buyan pa yang it Mayo, nagtatanganay it kwarta si Nanay
Mapaadlaw man o gab-i perming pangilaw si Tatay
Buko pansin ka pagkayarkar it bituka, tungka ag kabudlya
Sa sakop it usang dominggo rabuno uyang gador pahuway.
Pag-abot it enrolment nagpamaohoney si Toto
Malarga pa Odiongan rinay sa pag-uto-uto
Pakitang tawo yang rabuno sa maguyang ka pagharo
Pay kong si-o siong pagkabuot sa kaklaruhan ra ay buko.
Bayo ka pilang libo ni Toto nak palangga
Sunggoy ka bulig it batag nak si Tatay it nagtuba
Singgon rang kaaray bugana permi sa suya
Damot gani ni Nanay baeloney sa pagkutkot it raga.
Uya ksasaduran sa guing hihimo ni Toto sa Odiongan
Pagligar pa yang it tatlong adlaw hubyasey ka kaban
Pauno'y inubos sa pagpagrayag ag maging sa inuman
Nagyuda, nayubot ka bulsa nak na-addict sa lotohan.
Kada ka napuyos magbilang it takdo ag magtanga
Mautang sa ka-boardmate kato yang yaki'y pang-toma
Ma-date sa habig it ragat maubay, painit-init ag kag rayaga
Uya napuslan ka pagparaya it kag maguyan nak nagyuyupa.
Maigar pa ka pilang buyan si Toto ay mapauli
Ka usa ay naging ruha, tatlo , tingaya ka mga hali
Ragpon sa bayay maosyoso sa natabo o nangyari
Kato yaki'y sa kauyag, nakasabak si Toto it kabadi.
Indi mamalayan matikrag yangiy kag yuha
abuton it yain si Nanay nak tagipuuo'y nabigla
Si tatay pay mapangsuntok paunoy yum-py sa kahuda
Kanogon kag gaos para kang Toto nak guing hihigugma.
