PANAGHOY SA HUNASAN
ni Asi Maley
yawor nak pagrumrom
unor it hunahuna
ragang guing halinan
nioy ngasing ara?
baguntor nak matayog
imaw sida't tanra
sa mga yagting nak bato
tikang, ruto gui tuna
rampog nak marag-om
aya baga de yuha
rughan gani'y nalilisor
kumkom ka kahuda
mapanghamon ka ukaw
ayang gador de pabada!
sa kusog it habagat
pagkayagting ipakita!
muslag nak kamalayan
aya gui paraya
sa tentar it kalibutan
sapunga ng talinga
sa mayaing rayan...likaw!
panaw ay sigeha
ka pangaray nak maado
imaw it hanruma
waya kapuslanan...waya!
sambangkat nak hugor
sa yawor ay napaya
nagyamusang nak habyon
sa piliw igingragsa
hupit, nupay gani pispis
pako ay pagkayupa
hariin ka himutaan?
imaw it pangutana
hapros sa tagipusoon
ugar it panghingasa
raya sa pagguyang
kalisuran...kabayaka
pagpalanggang bawog
yunot nak paghigugma!
